德盃主場弱肉強食 多蒙特重登高峰

猪拉多纳

25/10/2011
文： 蘇斯黒柴

德國盃第二圈今晚共有八場賽事受注，當中上季德甲冠軍多蒙特主場迎戰德乙特雷斯登仲係免費台直播，多蒙特開季後演出令人失望，好在啱啱喺聯賽大炒科隆重拾自信，今晚主場出擊唔會揸流攤，特雷斯登近態唔曳，但級數差得太遠，多蒙特有力輕鬆取勝，「讓球主客和」讓球兩球都唔驚，照捧「讓球主勝」。（無綫翡翠台周三凌晨2時30分直播）




多蒙特今季表現同成績都較反覆，尤其歐聯三戰僅得一分，上周中作客希臘奧林比亞高斯輸一比三，成績同演出都令人失望，喺德國國內受到唔少批評聲音，認為佢哋會拖累德國喺歐洲聯賽嘅排名系數，球隊受到相當壓力，近期每戰無論遇強遇弱都全力以赴，尤其主場更加殺得性起，近期聯賽大炒奧格斯堡同科隆，共轟入九球不失一球，其中上仗對科隆嘅華麗演出，更有「王者歸來」氣概，連今季陷入低潮嘅香川真司都重拾狀態，今仗對手級數比奧格斯堡同科隆更低，理應再炒一次。




多蒙特單箭頭羅拔利雲度夫斯基對勁旅級數不足，卻係弱旅殺手，德國盃首圈對辛特侯遜梅開二度，近四場正式賽事共入六球。多蒙特喺首圈遇上低組別對手都強陣出擊大炒對手，今場唔使擔心會放軟手腳。


特雷斯登往績輸晒


特雷斯登今季回升德乙，會方決定大換血，人腳變動大要時間適應，佢哋首圈爆大冷加時淘汰利華古遜，但主要原因係主場出擊加上對手季前未Ready，呢班波作客成績比主場差得遠，佢哋過去四次作客西法倫球場全敗，零入球共失十三球，其中三次輸三球或以上，今晚難逃被大炒厄運。