夏利叔醫院覆診唔領軍熱刺凍到僵

猪拉多纳

03/11/2011
文： 朱楓

健康同成績，邊樣先重要？今晚歐霸盃A組有好戲上演，榜首熱刺會作客魯賓卡山。熱刺今場贏波就肯定進身32強，但喺呢個緊張關頭，領隊夏利列納竟然選擇去醫院覆診，冇隨隊去俄羅斯，預計續派副選應戰下，作客凍到僵嘅「地獄球場」凶多吉少，1.72倍主W有買趁早！（有線61、64、201及204周五凌晨1:00直播）




熱刺喺今屆歐霸盃睇落好醒，上輪主場對魯賓卡山，憑前鋒柏夫里約真高一個靚罰球贏1:0，暫時以7分排榜首，今晚只要再贏魯賓卡山，就可以提早出線32強。




不過朱楓覺得熱刺要實現呢個夢想唔易，事關佢哋一早講明唔會太着重今屆歐霸盃成績，睇佢冇幫主將雲達華治註冊分組賽就知啦。況且賽前熱刺官網更宣布領隊夏利列納因為要去醫院覆診做心臟手術，唔會隨隊去俄羅斯，改由助教奇雲邦特同祖佐敦領軍，爭勝戰意有幾多大家心裏有數！


魯賓卡山主場硬淨凍到震


事實上，熱刺喺之前3場分組賽好多時都派副選上陣，為免影響爭英超前4打下屆歐聯大計，朱楓估計熱刺今場好大機會續派柏夫里約真高等雪到硬晒嘅球員，再混雜湯馬士卡路爾等新仔應戰，戰鬥力絕對唔可以同平時打英超嗰班主力相提並論。




嚟自俄羅斯嘅魯賓卡山，暫時喺A組以4分排第3，落後榜首熱刺3分、二哥PAOK 1分，出線仲有機會，相信今晚主場出擊一定會搏命，畢竟佢哋之前3場分組賽，基本上場場都派晒前多蒙特前鋒希度華迪斯同前意大利國腳後衞保捷迪等主力上陣，擺明有心爭佳績。




再加上魯賓卡山主場出名硬淨，對上14場歐洲賽只係輸過1場咁大把，賽前朱楓仲收到風，話魯賓今晚天氣可能跌到得攝氏-2度，而且仲可能會落雨，熱刺班球員隨時凍到硬晒都有之，唔好話贏波，想攞1分都唔係咁易！