喜鵲自亂陣腳頂唔住曼城

猪拉多纳

19/11/2011
文： 郭球奇

踢波講到尾始終都係實力行先！雖然紐卡素今季表現令人驚喜，但今晚喺「魔鬼賽程」第一擊作客曼城，相信不敗身都係時候被破，畢竟兩隊人腳實在差天共地，最慘「喜鵲」呢排仲爆出唔少負面消息，可以算得上係自亂陣腳，近年交手又冇啖好食，冇理由唔捧1.68倍「讓球主勝」！




（有線200及300、廣東體育周六晚11:00直播）




要數今季英超最令人驚喜球隊，紐卡素認第二，相信都冇人敢認第一，打到11月尾喺英超仲未輸過，仲要壓倒車路士排第3，不過「喜鵲」嚟緊將遇到極大考驗，接連硬撼曼城、曼聯同車路士，相信真正實力會原形畢露。


主場突改名招惹民憤


假如紐記今晚主場對曼城，球奇覺得「喜鵲」仲有本錢延續神奇之旅，但作客搶分機會就甚微，一來紐記班球員本身實力根本難比曼城班星級戰將，何況今場仲肯定有翼鋒馬維奧斯缺陣，中場迪奧迪、奧巴坦、中堅米克威廉臣又上陣成疑，最慘紐記主場聖占士公園，近排仲無端端被老闆艾舒利改名，一班忠心fans梗係唔多高興，據聞隊長高洛仙尼知道後，立即轉軚表示唔考慮續約住，留待今季尾先傾，似乎內部開始醞釀危機。


曼城出二線兵都超幾班


曼城今季有幾勁？相信唔使球奇多講。雖然呢支「億萬大軍」嚟緊周中有場歐聯作客拿玻里嘅大戰，惟佢哋後備兵源實在太充足，改派占士米拿、薩巴列達同基捷基治等二線兵上陣仍然係超晒班，何況睇番數據，曼城前幾年冇依家咁勁，都已經恰死紐卡素，對上一次交手輸波已經係05年嘅事，「喜鵲」今晚睇怕插翼難飛！


橫數千軍


曼城主場5戰全勝

‧聯賽10勝1和入39球，平均每場入3.5球。

‧目前英超主場王，5戰全勝，勝率達100%。

紐卡素係英超盤王

‧目前足智彩英超「讓球」及「讓球主客和」雙料盤王。

‧近8次作客曼城未嘗一勝，錄2和6負。

雙方近9次交手戰績

日期 戰果（前者主場）

10/12/26 紐卡素 1:3 曼 城

10/10/03 曼 城 2:1 紐卡素

09/01/28 曼 城 2:1 紐卡素

08/10/20 紐卡素 2:2 曼 城

08/01/02 紐卡素 0:2 曼 城

日期 戰果（前者主場）

07/09/29 曼 城 3:1 紐卡素

07/03/31 紐卡素 0:1 曼 城

06/11/11 曼 城 0:0 紐卡素

06/02/01 曼 城 3:0 紐卡素