紅軍硬淨至叻煞車

猪拉多纳

20/11/2011
文： 阿占

唔知大家有無試過同朋友去酒吧睇波冇位，搞到勁冇癮，阿占上星期就試過喇！好彩有線依家推出按日自選英超服務，到時想去邊個屋企睇都得啦！至於今晚車路士主場迎戰利物浦嘅重頭大戰，阿占相信會係一場靠防守定輸贏嘅比賽，睇好作客嘅紅軍有力立不敗之地，2.05倍「讓球客勝」要捧場。（有線200及300、廣東體育周一凌晨0:00直播）


利記加歷查復出


利物浦依家喺聯賽排位唔算高，但今季畀人復甦嘅感覺非常明顯，最大原因就係佢哋防守硬淨咗好多，無咁容易輸波。事實上利物浦自9月中輸畀熱刺後，至今一直保持不敗，6場波取得3勝3和，而且呢段期間只失過3球波，當中荷西安歷基、史卡迪爾嘅高水平表現絕對要讚，今場仲有加歷查傷愈復出，有呢位「穩陣先生」壓陣，防線簡直如虎添翼。




唔好忘記，就算近幾年利物浦嘅成績低落，佢哋踢硬仗嘅表現依然非常對辦，上季就主場、作客「雙殺」車仔，今季亦先後作客贏過阿仙奴同主場打和曼聯，證明紅軍對住同級球隊會自動提升狀態。況且利物浦守得好之餘，仲有「一個殺晒」嘅蘇亞雷斯喺前面搵食，就算隊長謝拉特繼續養傷都無有怕啦！


車仔識攻唔識守


車仔今季喺「新莫連奴」保亞斯執教下，攻擊力強勁但防守力大減，同莫帥時代無得比。而且佢哋近況、信心明顯唔掂，上輪雖然一球小勝布力般流浪終止連敗，不過條防線對住對手嘅高空轟炸都非常狼狽，呢場亦只係車仔自開鑼戰後聯賽第一場保持不失。門將施治唔知係咪受傷患困擾，表現已經唔係以前嘅鋼門，右閘保辛華就不嬲識攻唔識守，搭埋件受醜聞纏擾嘅泰利，車仔防線真係畀唔到人信心，主場想贏波無咁易囉。


車仔英超大盤王


‧近8戰4勝2和2負，對上3戰勁失6球。




‧目前英超主場大盤王，5戰全部開大。

紅軍鍊車唔輸蝕

‧近8戰4勝3和1負，6次開細。

‧近6次作客車路士獲2勝3和1負。

頂占筍盤：利物浦（讓球客勝）

‧有線球彩台主持 阿占‧

電郵：soccer64@cabletv.com.hk

球彩群組：http://fb.com/icable64

PHONE波熱線：1831 678

開放時間：周日晚10:00至周一凌晨2:30（超級星期天）