車仔添食笑騎騎

猪拉多纳

17/12/2011
文： 樂比堅尼

今晚英超尾場，復甦嘅車路士作客韋根。車路士經過前排低潮後，領隊保亞斯重新執過隊波，新陣畀人感覺係防守穩陣咗，亦較之前有朝氣活力，連贏三場令球員信心大增，今晚對住被列為降班大熱門嘅韋根，車仔可笑住攞三分，樂比仔捧「讓球客勝」。




（有線200及300台周日凌晨1時30分直播）


車仔三連勝撻番着


車路士上仗反勝曼城二比一後，落後榜首曼城七分，保持爭標機會。車路士呢幾場波最大轉變就係前線終固定咗用桑馬達、史杜列治同埋杜奧巴三人攻堅，而為改善防守，防中奧里奧爾羅美奧被委以重任，有需要時右閘伊雲洛域亦會移入中路，呢幾個調動令車仔攻守都有改進，成功起死回生。




降班大熱韋根上場亦大踢爭氣波，作客以二比一擊敗西布朗，取得今季第三場勝仗，不過呢場贏波運氣佔好大比重，表現唔見得有太大進步，所以即使今仗主場出擊亦唔好抱太大期望。事實上，韋根首席射手迪山度只係車路士過氣預備組殺手，根本未見得大場面，拍落車仔真係差幾班。


韋根放盤球員冇癮


韋根今季另一不穩定因素就係班主韋倫尋求賣盤，令球隊士氣冇之前幾季咁好，加上韋根一向特性係遇強腳軟，今季對熱刺、曼城及阿仙奴等強隊全部輸波，相信今仗面對車路士亦難有作為。


英超降班賠率


韋根 1.44倍

布力般流浪 1.67倍

保頓 1.67倍

史雲斯 3.25倍

狼隊 3.5倍

資料來源：威廉希爾