阿蘇做勝利大將

猪拉多纳

自從前季重新編排五班直路賽之後，跑過四場都由半冷門勝出，包括09年12月27日爆出33倍嘅「放縱」，事隔兩年，尋日舉行本季首場嘅五班田草1000米，結果又係由蘇廐處女馬「勝利大將」先拔頭籌，蘇保羅、普萊西呢對新西蘭騎練攜手炮製出11倍冷Ｗ。
  
勝利大將加眼罩即直帶到底，打破處女身。


李茂銘：勝利大將已適應水土


雖然聖誕節是西方大日子，好多外籍練馬師趁住呢個空檔外遊，但係蘇保羅就繼續留守督師，果然勤力有回報，「勝利大將」成為蘇廐本季第五Ｗ，同時造就鄉里普萊西打破直路賽弱門數據，原來騎者對上一場田草1000米頭馬，已經追溯至2010年7月4日嘅「風火神駒」，後駒咁啱又係同「勝利大將」一樣，加眼罩建功。
  
李茂銘（左）、蘇保羅（中）




對於「勝利大將」跑番應有水準，馬主之一李茂銘表示配備變動固然有幫助，不過愛駒完全適應水土，先至係最大關鍵，既然今場跑1000米直路賽開竅，佢同蘇保羅都有晒默契，「勝利大將」下場重返四班，一於原裝人馬再響同程爭連捷。