飛到馬到年終賽

猪拉多纳

　　2011年最後一戰嘅賽果爆得吓，誠如同文Jack兄賽日所言，年終賽唔係咁利熱門。數數當日10場大熱門命運，僅3駒入到三甲，贏嘅更只得「捉金」。而在中後場次嘅大熱門，表現可謂慘不忍睹，跑到冇P多的是，事實上，由第四至第十場之中，係得1隻「財運」跑到個P。如果場場追住大熱嚟買，真係輸到褲都甩！

　　熱門喺當日冇乜贏過，但臨尾落重飛嘅馬，就不停咁得手，好似「神奇飛龍」、「福到多多」。就連巨額過關W嘅「續領風騷」一樣搞掂，有時啲嘢，真係唔到大家唔服。

　　譬如「福到多多」，上場四班贏泥地一哩，獨贏有8倍，四升三班竟然捧到7倍唔夠，賽前真係估唔到會咁熱，從票數顯示，信心之大，似乎完全唔會覺得同場嘅「財運」、「非常好」、「勁飛馳」等駒，有本事威脅到咁款？！

　　神奇飛龍重票得手

　　又譬如「神奇飛龍」，上賽已經損手1次，拉士由十幾倍打到7倍（涉款約百萬以下），結果喺泥地一步都冇。今場喺最後階段又嚟過，喺十倍獨贏過外，急跌至唔夠7倍（短時間W飛增長約130萬），而呢次終於有回報，如果係同一批人士的話，真真正正連本帶利返晒嚟。

馬會賽馬節目主持　洪禮賢