祖記靚靚新場錫晒你

猪拉多纳

05/02/2012
文： 巨高

意甲榜首球隊祖雲達斯，周日將主場對錫耶納。以往錫耶納被認定為祖雲達斯首席「打手」，陣中唔少球員都來自斑馬兵團。但自從○六年電話門醜聞爆發之後，祖雲達斯對錫耶納嘅「資助」就逐漸減少，坊間所謂嘅衞星隊，亦隨着時間流逝而逐漸淡化。實在祖雲達斯與錫耶納關係不復當年，大家毋須再以陰謀論去猜度雙方取向。以今季祖雲達斯對聯賽冠軍嘅渴求，今場力足在新球場大勝對手，「讓球主勝」值得捧場。




（周日晚10時開賽）




祖雲達斯喺一月轉會市場唔太活躍，新加盟球員只有四個，包括波里路、柏度恩、馬田卡沙利斯及阿積士新秀保爾。雖然人數唔多，但勝在對症下藥。特別要講吓波里路，佢喺AC米蘭及羅馬都踢唔出水準，難得祖雲達斯肯畀機會佢，波里路誓必拚盡所有去報答教練干地知遇之恩，亦希望透過祖雲達斯去爭取歐國盃參賽資格。波里路有好鬥志支持，有機會落場的話一定唔會令大家失望。加上馬治斯奧及胡仙歷已完全康復，兩大主力復任正選對球隊爭勝有幫助。


錫耶納作客曳聽炒


錫耶納今季淨係識打主場波，相反聯賽十次作客都未贏過。另外錫耶納近六次作客祖雲達斯僅得一和五負，賽績對錫耶納極為不利，今場慘敗都好正常。




鑑於近日世界各地受嚴寒天氣影響，唔少球賽都無法正常進行，惟對祖雲達斯主場賽事影響唔大。事關新建成嘅祖雲達斯球場設備完善，球場發熱線及去水管道均以先進技術建設，除符合環保要求，更可長期令草面保持理想狀態，良好場地應可令今場比賽順利進行。


羅馬對國米今晚踢


此外，原定昨晚舉行嘅（六）70羅馬主場對國際米蘭，將延期至今晚上演。

（now 631周日晚10時直播）