AC神箭伊巴謙射爆祖記

猪拉多纳

08/02/2012
文： 走肖

意盃4強首回合爆發，AC喺主場對祖雲達斯！「神聖北方聯盟」名存實亡，兩軍都唔妥對方，既然AC射手伊巴謙莫域嘅入球數字仲多過祖記5個前鋒入球總數，主W有2倍更抵捧。（廣東體育周四凌晨3:45直播）


意大利傳媒認為，「電話門」發生前，紅黑兵團同祖記有特殊嘅互惠互利關係，等大家都可以爭取好成績。不過自從假波案爆出，兩會關係已瀕臨破裂，祖記新揸弗人亦唔Buy呢一套，最慘係AC一路都睇中嗰件泰維斯，原本今夏極有機會簽到佢，點不知殺出個程咬金，最近祖記亦加入「泰仔」爭奪戰，兩會早就擘咗面，難怪日前AC射手伊巴謙對拿玻里一戰領紅，「斑馬軍」都開聲嗌意大利足總重罰佢停賽3場啦！「神聖北方聯盟」早已名存實亡，最重要係佢哋喺聯賽打崩頭，今次意大利盃撞到應，仲點會同對方客氣先？

伊巴謙入波多過祖記前鋒

雖然紅黑兵團仲有大籮傷兵，但伊巴謙莫域喺緊接對烏甸尼斯嘅聯賽坐波監，呢場點都會踢好波向球迷交代，順便摑番多嘴嘅祖記一巴。再講，今季伊巴謙喺聯賽已經有15球進帳，相反祖記5個前鋒馬特尼、胡仙歷、加利亞雷拉、波里路同迪比亞路夾埋入得13球，假如大家都唔用最強陣應戰，簡直係明益伊巴謙莫域入波做主角。