切塞納新兵有料到 孖住拉素做大騷

猪拉多纳

09/02/2012
文： 朱楓

由於嚟緊周末羅馬舉行欖球賽事，拉素主場對切塞納嘅意甲提前至今晚舉行，但對於目前傷兵滿營嘅「藍鷹」嚟講可謂毫無着數，事關切塞納近期引入多名高質球員後實力「大升呢」，作客鬥攻都絕對唔輸蝕，朱楓捧1.88倍「入球大」！（開賽時間：周五凌晨3:45）


近排意大利落大雪，但意甲仍堅持如期舉行，結果搞到拉素日前足足用咗7個鐘先去到熱拿亞，喺消耗大量體力下輸2:3不特止，前鋒洛基、中場靴蘭尼斯同右閘史坦基域斯仲分別喺練波同比賽中受傷。當中洛基同史坦基域斯更肯定緣盡今晚嘅賽事。

「藍鷹」殘兵靠高路斯數胡

由於近日意大利天氣嚴寒，拉素要求將今晚對切塞納嘅賽事提早舉行，仲話如果唔得不如取消。「藍鷹」當然想啦！事關佢哋目前除咗以上提及嘅幾位傷兵，今晚仲有中場莫利、高薩克、簡拿、布洛治同後衞安德里戴亞斯唔出得，加埋後衞莫迪保迪亞基特要停賽，陣容可謂殘到爆。拉素唯一值得安慰係今季主場只輸過畀祖雲達斯同熱拿亞，老牌前鋒高路斯亦保持高效入波率，仍然有入波本錢。

切塞納以逸待勞有着數

對家切塞納為護級積極擴軍，而且班新兵實力唔曳，早前已作客逼和前列球隊拿玻里，今晚作客拉素，更有前祖記射手伊亞昆達、前拿玻里中場馬里奧辛坦拿同前拉素中場迪尼路首度亮相，配合王牌射手梅度，呢個攻擊組合甚有睇頭，唔好唔記得切塞納上周末對卡坦尼亞場波因天氣問題而取消，今晚以逸待勞作客拉素，真係有本錢同對手合力炮製大騷o架！