德甲孖堡爆發新射手「大」戰

猪拉多纳

10/02/2012
文： 走肖

今晚德甲上演換槍「大」戰，禾夫斯堡喺主場對弗賴堡，1.65倍入球大最抵捧。唔好以為近期禾夫斯堡入波少、唔識攻，實情佢哋喺冬季轉會市場掃入8位新球員，撞啱弗賴堡都簽到科隆前鋒費里斯，代替離隊嘅柏比斯施斯孭起前線，分頭換槍夠條件開入球騷。（有線61及201周六凌晨3:30直播）


狼堡馬加夫最叻發掘射手


上星期禾夫斯堡以0:0打和慕遜加柏，教練馬加夫安排新簽嘅科英布拉大學前鋒伊巴謙施素高打正選，佢係今季「狼堡」第36個喺德甲出場嘅球員，打破馬加夫喺00至01年球季執教法蘭克福嘅單季用35個球員紀錄，德國傳媒笑佢係「真人版FM大師」，暗寸佢玩足球經理遊戲上腦，亂咁買人又隨便試。




不過大家唔好忘記，馬加夫喺09年帶領禾夫斯堡攞聯賽冠軍，當時加菲迪同迪斯高分別喺射手榜帶頭，今次馬加夫發起「轉會二次革命」，隨時又有新射手彈出。另一方面，弗賴堡賣走柏比斯施斯後，簽入費里斯補充火力，既然兩隊都有新前鋒要證明身價，買大啱數！