馬體會受讓搵着「素」

猪拉多纳

16/02/2012
文： 朱楓

今晚歐霸盃除咗曼市雙雄，其實拉素喺32強首回合主場對馬德里體育會一戰亦好有睇頭。馬體會自施蒙尼執教後，防守硬淨到爆，今仗倒戈更加唔衰得，加上前線有上屆歐霸盃神射手法卡奧掛帥，對住傷兵滿營嘅拉素，受讓一球朱楓梗捧1.54倍「讓客」啦！（有線64及204周五凌晨2:00直播）




賽前傳媒都將焦點放喺馬體會新教頭施蒙尼身上，皆因呢位前阿根廷名將曾經効力拉素4年，今晚倒戈當然唔衰得。事實上，馬體會自施蒙尼執教後，成績明顯有好轉，踢6場西甲取得3勝3和未輸過不特止，最恐怖係1球都未失過，預計今場喺中堅祖奧米蘭達復出下，防線將更加穩固，加上前線有上屆歐霸盃神射手法卡奧同巴西好波之人迪亞高，前中後三線可謂極之齊整。




拉素傷兵滿營




同馬體會相反，早前喺D組次名出線嘅拉素，近排防線倒水咁倒，上場意甲主場對住護級分子切塞納居然都先失兩球，最後幾經辛苦先反勝3:2，連埋之前對熱拿亞輸2:3，對上2場竟然失咗5球。




鬼咩！拉素目前傷兵多到暈，繼中場布洛治、簡拿、莫利同中堅安德里戴亞斯後，前鋒洛基啱啱亦宣布拉傷大腿肌肉要缺陣1個月，就算前線有高路斯同靴蘭尼斯掛帥，咪又係前面入埋唔夠後面失。況且，拉素近16次對住西班牙球隊僅錄得5勝4和7負，冇任何甜頭可言，就算有主場之利，睇怕亦讓唔起馬體會一球！