黃金聯面臨散班冇「雄心」

猪拉多纳

17/02/2012
文： KIT

「海軍鬥水兵」，除咗可以形容豬狼之戰外，仲可以比喻今日下晝場墨爾本雄心對黃金海岸聯！今季澳職球隊贏開一條龍，輸開就一條蟲。呢場「水鬥水」真係難估，惟有撐曾經喺12月有過精彩演出嘅雄心再嘗勝果，要1.58倍主W。（有線64及204周五下午5:00直播）




墨爾本雄心喺上年12月全勝踢到識飛，但唔知點解一踏入2012年後居然未贏過，已經跌到落第6位，不過今日主場對住全澳職公認最差嘅黃金海岸聯，點都應該贏番場。事實上，雄心之前幾場都係硬仗，對手係噴射機、鳳凰、獅吼、光輝，仲有「一哥」中岸水手！雄心表現雖然唔稱得上好好，但都算踢出中游分子應有實力。今場賽前更傳來好消息，休戰半個月嘅隊長麥湯臣有機會復出，有佢壓陣班波都醒神啲！


傷兵多要用青年軍頂檔


「沒有最差、只有更差！」黃金海岸聯今季一場好波都未踢過，難怪曾經牙擦到爆嘅教頭比利貝治最近成日愁眉苦臉，事關當地根本冇乜球迷撐場，有傳老闆都冇癮，下季都未必再玩。




球隊前途未卜，難免影響球員作戰心態，冇錢買人傷兵又多，惟有起用大量年輕球員，今場教練比利貝治就帶咗13個平均年齡得20歲嘅青年軍南下。睇番今季對賽往績，「黃金聯」今季主場兩鬥雄心只得1和1負，今仗仲要作客，實在難以睇好。