阿馬利孭飛費倫贏「玻」冇難度

猪拉多纳

17/02/2012
文： 朱楓

「紫百合」重生啦！費倫天拿自從簽入前鋒阿馬利後，成隊波即時生晒，今晚有佢拍住趕及傷愈復出嘅「Jo-Jo」，對住今季長期有作客病兼有歐聯後顧嘅拿玻里，有力再下一城要平手W！（廣東體育周六凌晨3:45直播）




費倫近排愈打愈好，繼前仗贏錫耶納後，上仗再砌低爭標奇兵烏甸尼斯，首次喺今季意甲錄得2連勝，新加盟嘅阿馬利可謂功不可沒，有呢位大舊中鋒掩護，被意大利傳媒暱稱為「Jo-Jo」祖維迪即時翻生，最近兩仗勁入3球。賽前費倫仲證實呢位黑山球星膝傷已無大礙，加上中後場有正博季尾轉會AC米蘭嘅蒙杜利禾同拿達利鎮守，中場拿沙利停賽影響似乎有限。


史奈達無礙博國米反彈


今季冇咁sharp醒嘅拿玻里，上場贏基爾禾2:0，先取得近5場首仗勝利，作客至今更只累積3場勝仗咁大把。為應付下周中歐聯16強主場對車路士，據聞今晚可能先將射手卡雲尼放喺後備，改用彭迪夫打單箭頭，擺明心繫歐聯，作客強勢嘅「紫百合」睇怕凶多吉少！




同晚國際米蘭會喺主場迎戰博洛尼亞，「藍黑兵團」上仗倒灶不敵路華拿後已錄得5戰不勝，幸日前喺操練時拉傷肌肉嘅史奈達證實無礙，對住今季作客只得2勝嘅博洛尼亞，預料可及時反彈博2.1倍「讓主」！（now633台周六凌晨3:45直播）