獅吼發力尋求勝利

猪拉多纳

18/02/2012
文： 張志德

今周英超讓路畀足總盃，細鬼決定轉為推介另一個英語國家嘅聯賽，澳職布里斯班獅吼主場對墨爾本勝利。澳洲幅員遼闊，客軍往往要遠距離穿州過省，飽受舟車勞頓之苦，可謂未見官先打八十大板。獅吼本身實力已高過對手，加上佔地利，今場勝算相當高。




（有線64及204台周六下午4時45分直播）




獅吼係上季常規賽兼季後賽冠軍，實力毋須懷疑，現時常規賽已進入爭標大直路，獅吼仍然落後榜首中岸水手五分，球隊必須急起直追。佢哋早前作客照贏水手，充分反映獅吼狀態及鬥心都處於高峰，今仗回師主場鬥弱隊墨爾本勝利，更加冇理由失拖。




獅吼最強就係進攻點多，前鋒貝利沙、中場尼高斯及柏亞達路等多位中前場球員，都有上乘數胡能力，呢種踢法進取嘅球隊，特別令人有信心。


墨爾本作客澳職最差


墨爾本勝利之所以位處下游，主因係作客成績太差，今季九場聯賽作客只得一勝二和六負，屬澳職球隊中最差，其中近六場作客輸咗五場。雖然話勝利有名將基維爾助陣，但足球始終係團隊運動，事實亦證明基維爾加盟亦未能令勝利成績有明顯提升。仲有一點值得留意，澳職不設降班，墨爾本勝利冇護級壓力，唔相信佢哋今場會突然發力搶分。




本港至型足球明星，519入波功臣，現為有線電視台柱級資深講波佬，人稱鬼Sir。鬼Sir睇波有乜獨到見解，毫無保留話晒你知。