Fans喪噓士氣插水薩拉戈薩腹背受「迪」

猪拉多纳

20/02/2012
文： 走肖

薩拉戈薩今晚喺西甲主場對貝迪斯，平手都要唔過。最近薩拉戈薩死忠粉絲發起咗個喪噓行動，目的係要趕扯麻煩會長伊格利西斯，每逢比賽踢到32分鐘就會集體柴台，雖然咁做唔係針對球員，但肯定會影響軍心，貝迪斯唔使讓捧得過。（開賽時間：周二凌晨4:00）




今季薩拉戈薩球迷經常抗議，目的係為咗趕扯會長伊格利西斯，弊在佢面皮厚唔肯走，於是有薩拉戈薩球迷組織發起柴台計劃，無論主場定作客，每逢比賽到32分鐘就喝倒采，因為薩拉戈薩創會年份係1932年，佢哋希望伊格利西斯聽到後自動消失。不過球迷可能估唔到，咁做連薩拉戈薩士氣都插埋水，搞到上星期贏愛斯賓奴至終止到連續16場不勝走勢。


貝迪斯火力唔曳


今場薩拉戈薩有後衞蘭沙路停賽，想贏波添食更加難，特別係貝迪斯近2次作客薩拉戈薩都勝出，近10場又有5勝1和4負，期間贏過華倫西亞、馬德里體育會同畢爾包，證明戰鬥力唔曳，即使中場艾恩尼坐波監，仲有射手魯賓卡斯度同中鋒辛達告魯斯（圖）撐住，佢哋今季分別喺聯賽有6球同5球進帳，對住輸到近乎麻木嘅薩拉戈薩，當然會把握機會省多兩粒。