保亞斯車毀人亡

猪拉多纳

21/02/2012

歐聯十六強首回合英意對決，意甲大軍拿玻里主場迎戰英超名牌車路士。拿玻里前線擁有「恐怖三叉戟」卡雲尼、拿維斯同咸錫，而且遇強愈強，極難對付！車路士後防不穩，而且將帥鬧不和，泰利及林柏特等土炮唔肯再為領隊保亞斯賣命，有意睇住佢輸埋歐聯被炒，車仔受讓都要唔過，捧拿玻里上盤。（有線61及201台周三凌晨3時45分直播）


拿玻里水準其實唔算好穩定，今季聯賽主場對切塞納及博洛尼亞等都贏唔到，單睇戰績難免令人有戒心。不過，呢班波其實暗地裏有多少「利物浦feel」，遇上次級對手慣性懶懶閒，面對真正勁旅先會上心，今屆歐聯分組賽關鍵一役主場戰勝英超一哥曼城，正正係球隊代表作，車路士近況雖曳，但假假地都係歐洲名牌球隊，相信拿玻里眾星都想於主場搞掂對手。

拿玻里三叉戟煞食

車路士主帥保亞斯失勢，據報今戰想搵泰利、林柏特同杜奧巴等老鬼幫手，希望扭轉頹勢，但前兩者已擺明唔肯為佢賣命，就當佢哋聽話落場，車仔條爛鬼防線面對拿玻里「恐怖三叉戟」卡雲尼、拿維斯同咸錫都好牙煙。


拿玻里首回合主場出擊實採取主動，射手卡雲尼上場對費倫天拿又入兩球，狀態弗到漏油，另一邊廂車路士前鋒費蘭度托利斯冇晒信心，要老將杜奧巴剛踢完非洲國家盃，帶住疲累身軀擔大旗，實在難以予人信心，受讓都冇着數，一於捧拿玻里。

歐聯密碼

3 車路士3場作客分組賽不勝兼全部有失波


4 拿玻里前鋒卡雲尼今屆歐聯入4球，包括分組賽擊敗曼城一役個人梅開二度

7 車路士過去7次作客意大利成績為1勝3和3負

11 拿玻里近11場歐洲賽主場保持不敗

猪拉多纳

东方波经是日精选