寸王上身要打殘未來老細 沙基利揚言玩謝列貝利

猪拉多纳

22/02/2012


巴素利今晚喺歐聯迎戰拜仁，夠晒話題性，因為巴素利嘅瑞士超新星梳頓沙基利，經已落實喺今夏轉投拜仁。賽前梳頓沙基利寸王上身，佢話今晚唔會錫住未來老細，而且講明自己有條件打正選，又話轉會後要同列貝利鬥整蠱，暗示球場內外都要玩殘對方。


唔介意同「刀疤仔」比較


梳頓沙基利喺巴素利以2:1打沉曼聯嘅分組賽，包辦2次助攻，信心爆棚嘅佢話唔介意傳媒搵佢同列貝利比較，仲暗示準備取代對方做拜仁正選：「我哋有好多相似嘅地方，擅長個人突破，鍾意入波同助攻，對手永遠唔知我哋想點。我知道要成為拜仁嘅正選好難，不過我選擇轉會，絕對唔係為咗長期坐冷板。」




對於「刀疤仔」列貝利玩隊友嘅傳聞，梳頓沙基利更加話冇有怕：「有關佢嘅惡作劇我聽過好多，幾好玩吖。其實我都成日整蠱隊友，我唔止想領教吓列貝利嘅惡作劇，仲想整蠱番佢轉頭。」另外，膽生毛嘅梳頓沙基利強調唔會對拜仁留手：「對住未來老細感覺好特別，不過我希望拜仁球迷可以睇到我有幾多料。」