南韓U23口硬心怯細好過W

猪拉多纳

22/02/2012
文： 九叔

贏多一場波就可以去倫敦奧運，自然會產生好大壓力，南韓U23今日作客對阿曼U23，雖然口口聲聲話要攞晒3分，但係都好難信得過，博吓個1.57倍入球細合理啲。（now670台周三晚10:30直播）




家陣南韓U23响奧運亞洲區外圍賽A組以8分帶頭，咧住第2位嘅阿曼1分，假如今場贏到，就即刻攞到倫敦奧運入場券，所以主將洪正好，甚至教頭洪明甫都走出嚟，話要以贏波為目標，不過呢個世界係咪樣樣嘢都可以心想事成呢？睇怕就未必嘞，而且韓國人自己對呢場波其實好多顧慮，似乎有啲口硬心怯。


抵阿曼戴口罩出機場


南韓U23雖則提前去咗多哈集訓，仲响星期日就去咗馬斯喀特適應場地，準備今場火併阿曼，但係隨軍記者就爆料，話隊波比較擔心班細路唔習慣中東氣候同時差，好驚佢哋患感冒，所以去到馬斯喀特落機嗰陣，居然有好多個球員戴住口罩出機場，緊張成咁，你話壓力唔大都冇人信啦！




事實上，馬斯喀特呢個地方對南韓足球界嚟講，簡直係個「噩夢之地」，2003年佢哋嘅大國腳曾經响呢度輸畀阿曼1:3，場波被形容為韓國足球史上最醜嘅一戰，所以成班人都有心理陰影，今場波多數玩緊迫攔截，防守反擊，一切只求穩陣。咁嘅部署，即使南韓U23舊年主場贏過對手兩次都信唔過，玩細好過博W。