曼聯阿積士大宴球迷

猪拉多纳

23/02/2012
文： 蘇豪

歐霸盃三十二強次回合，英超勁旅曼聯主場迎戰荷甲名牌阿積士，「紅魔鬼」首回合作客贏二比○，今場或會派出部分副選出戰，主勝偏熱唔抵玩。曼聯後備兵一樣識入波，阿積士決心絕地反擊，後防定必暴露大量空位，預計今場會有唔少士哥，捧大盤最好！（有線61及201台周五凌晨4時05分直播）




曼聯首回合作客淨勝兩球，優勢明顯，佢哋周日聯賽作客諾域治，為免搏殘班兵，主帥費格遜未必派全部主將落場。「紅魔鬼」出名後備力量勁，射手查維亞靴南迪斯近期喺聯賽畀韋碧克搶走正選，首回合擔正即有入波，此子擅於反擊爭取士哥，今場大把空間畀佢發揮。另外，費Sir仲可能會派小將保羅普巴落場，呢位法國新星若然有得踢，肯定會盡力爭取表現。




紅魔讓得多制唔過




阿積士上次主場出戰未見優勢，作客奧脫福情況更壞，今次仲有射手史基賀臣、中場艾安安奧及守將雲達韋爾等主力缺陣，相當難搞，雖然晉級機會唔大，但一眾球員都會盡吓人事，勢將防線推前搶攻，後防重心維頓漢上嚟助攻時甚具霸氣，但需知查維亞靴南迪斯速度鬼死咁快，維頓漢一旦失位，恐怕連車尾燈都睇唔到，阿積士隨時愈急愈亂，畀對手有機可乘o趙多幾粒。




曼聯之前五次主場對荷蘭球隊全勝，阿積士近八次對英格蘭球隊三和五負，「紅魔鬼」績都贏埋，既然係咁，點解唔玩「讓球主勝」？皆因「紅魔鬼」後防亦非甚麼好東西，神經刀中堅莊尼伊雲斯時得時唔得，難助球隊保持不失，加上依家形勢佔優，防守時容易鬆懈，讓得多好擇使，預期曼聯可贏波，但捧大盤更穩！