德乙荷乙榜末大格鬥

猪拉多纳

24/02/2012
文： ComboKing

今晚有多場乙組波，德乙及荷乙不約而同有榜尾之戰，分別為德乙羅斯托克主場對恩高斯達特，荷乙阿高夫主場對雲登。呢種護級「六分波」，對賽雙方都要搏命搶三分，踢法必然進取，有利製造入球，直取大盤。




德乙包尾羅斯托克同尾二恩高斯達特相距只有一分，羅軍今場只要贏波就可以壓過對手脫離榜尾，球隊爭勝誘因非常大。事實上，羅斯托克自知作客唔掂，往往揀主場賽事先至搏殺，對上一次主場，就同杜伊斯堡鬥攻，結果贏四比二。羅斯托克食過翻尋味，預料今仗都會採取主攻戰術。




恩高斯達特近期爆冷守和兩支前列分子杜塞爾多夫及格雷特霍夫，狀態相當不俗，今次遇上實力接近嘅羅斯托克，冇理由再主守求和，相信恩軍都會以三分為目標，同對手搏拳。




荷乙方面，阿高夫落後尾二雲登三分，更加冇失分空間，慶幸係阿高夫上仗以三比一擊敗伊高斯，取得自上年九月尾以來首場勝仗，有助提升球隊信心，當然要乘勝追擊。不過雙方近五次交手，都由雲登勝出，作客亦會同阿高夫火併。