利雲特作客曳受讓咪制

猪拉多纳

25/02/2012
文： 朱楓

今日朱楓將會踩過界玩埋攤路，心水係博愛斯賓奴（圖右），事關佢哋今季主場表現一直好穩定，喺西甲尾場對住作客9連敗嘅利雲特，依家唔攞3分等幾時？（now632台周日清晨5:00直播）


愛斯賓奴殺上第5


如果季初大家覺得利雲特係西甲神奇球隊，相信嚟到季中會覺得愛斯賓奴一樣咁神奇，皆因佢哋唔經唔覺，已經殺到上聯賽榜第5位，靠嘅就係穩定嘅表現，同埋主場威力，話晒佢哋喺自己地頭逼和巴塞隆拿同贏過馬體會，就知唔講得笑啦！




相反季初係威係勢嘅利雲特，近排愈踢愈沉，上周主場更加以3:5不敵華歷簡奴，賽後畀球迷鬧同榜尾球隊冇分別不特止，由阿仙奴外借加盟嘅中場柏祖羅拔圖仲私自離隊，第二日都冇蒲頭，面臨被球會重罰，再睇埋佢哋啱啱仲將後防大將維多利亞諾蘭奴賣去中超、近9場作客更全部輸晒（見下表），已經愈來愈唔似爭到來屆歐洲賽席位，今場受讓半一都信唔過！