歐霸盃聯城一線 紅魔做畢爾包細界

猪拉多纳

08/03/2012
文： 蘇豪

歐霸盃十六強來了！今晚上演八場首回合賽事，曼市雙雄曼城及曼聯繼續分途出擊，曼城人強馬壯作客葡超士砵亭（有線61及201台周五凌晨2時直播），1.67倍客W值博；曼聯主場迎戰畢爾包（有線61及201台周五凌晨4時05分直播），「紅魔鬼」近年對西班牙球隊和多過贏，而且極旺細盤，主W冇肉食不妨揀細！




英超「二哥」曼聯主場迎戰西甲大軍畢爾包，「紅魔鬼」英超主場出擊蝦蝦霸霸，但今季於盃賽踢到不知所謂，歐聯分組賽主場三戰只贏魚腩加拉迪，其餘兩戰巴素利及賓菲加和晒，早為出局埋下伏線。轉戰歐霸盃後，「紅魔鬼」上圈次回合主場對阿積士爆冷輸波，任老費點插點鬧，班兵仍然死不悔改，今戰主勝熱到燙手，值博率唔高！




英超冠軍爭霸盃鬥到最後直路，「紅魔鬼」打盃賽難免冇咁肉緊，相信費Sir今仗會作輪換，基斯史摩寧、路爾斯安達臣及查維亞靴南迪斯等有望擔正。翻查往績，曼聯近十次對西班牙球隊開出一「大」九「小」，唯一一場開「大」屬上屆歐聯決賽不敵巴塞，今次鬥畢爾包料會續吹「細」風。


畢爾包患恐英症


畢爾包患上「恐英症」，近七次作客英格蘭球隊一和六負，戰績極曳，今次作客奧脫福唔會太大想頭，頂多想爭番個作客入球，單箭頭洛蘭迪目標太大，唔易爭取士哥，預期今仗戰情膠着，兩隊冇乜交收，細盤有計。