若要生活好 仲追利物浦？

猪拉多纳

12/03/2012
文： 麥馬拿仁

仁：麥馬拿仁　高﹕巨高


「若要生活好，咪買利物浦」呢句話講咗好耐，佢哋前晚又以0比1輸畀新特蘭，跌至第7位，想攞下屆歐聯入場券？睇怕好難咯！今日繼續搵嚟巨高，同大家講吓「紅軍風景」。


仁：今場有冇買利物浦呀？


高﹕點敢呀，呢班波係列強中最古靈精怪，聯賽盃捧盃但輸盤，跟住連輸畀阿仙奴及新特蘭，邊度有益人o架，我哋《東方波經》好多年前已經提咗大家o架喇！


仁：依家利物浦落後第四位車路士、阿仙奴10分，冇乜機會攞到歐聯入場券，輸畀新特蘭後，英國傳媒甚至提出「杜格利殊應否下台？」因為杜Sir比佢前任鶴臣用多過億英鎊買球員，但鶴臣執教20場攞到25分，杜Sir近20場只得26分，實際就係聯賽攞多一分，以及攞多個聯賽盃，所以引起質疑，好多人更批評佢重用查理阿當等忠心但冇料本地球員政策。


高﹕杜Sir話晒德高望重，即使再輸多幾場，地位都唔會受動搖，最慘係利迷唔知要忍到幾時啫！你話搵到莫連奴教又唔同，但莫帥唔會睬你呢！

仁：我哋前面講咗好多利物浦衰嘢，但周中主場對愛華頓，又唔好睇死佢噃，因為愛華頓個勢咁勁，實被睇好，當黑嘅利記好興喺呢個時候打翻身仗o架！

高﹕呢啲係知恥近乎勇定識得搵食呢？

仁：咁你要去問杜Sir囉！不過呢班波心理質素出名曳，依家個勢又好似擸咗個聯賽盃就滿足，心態差到不得了，要博佢哋反彈真係要三思。