曼聯焗攻同畢爾包鬥大

猪拉多纳

15/03/2012
文： 蘇豪

另一場歐霸盃十六強次回合賽事，英超勁旅曼聯作客西甲主場惡爺畢爾包，「紅魔鬼」首回合落後二比三，若想晉級必須淨勝兩粒，但球隊十九次作客西班牙只贏兩次，平手盤揀唔落手。「紅魔鬼」顧得攻嚟顧唔到守，進退失據，但預期今場會有唔少士哥，捧大最好！（有線61及201台周五凌晨2時直播）




曼聯目標明確，贏三比二有得加時，一粒唔多夠數，淨勝兩球先穩獲晉級資格，兩個字，焗攻。不過，「紅魔鬼」向來怕鬥技術型球隊，過去十九次作客西班牙球隊只贏兩場，首回合被畢爾包反客為主，對手控球在腳互傳好少甩波，曼聯球員得個撲字，防線仲畀人搓到散晒，今戰雖有爭勝決心，但無贏波把握。




曼聯射手朗尼近三戰入五球，屬球隊反擊最大本錢，快翼艾舒利楊格亦弗，逐個進攻球員嚟秤唔輸蝕，有條件爭取士哥，不過，最忌球隊後防不穩，首回合右閘拉菲爾達施華唔集中累球隊輸第三球，今次大軍要搶攻，防線壓得更前，暴露大量空位畀對手打反擊，門神迪基亞近況大勇，但並非三頭六臂，除非打到上晒身，否則難保不失。


畢爾包唔赦紅魔


畢爾包超級中鋒洛蘭迪首回合已見功架，於前線擔位一流，無論二傳或自己埋門都咁有威脅，仲有蒙尼恩及迪馬高斯等人支援，進攻變化多。大軍近十次主場出戰贏九場，絕對唔赦「紅魔鬼」，將於主場繼續進攻，雙方勢必上演入球騷。

好久没做猪