賀芬咸繼續大特賣

猪拉多纳

16/03/2012
文： 蘇斯黑柴

德甲獨腳戲賀芬咸主場鬥史特加，賀芬咸上仗作客安聯球場慘遭拜仁重創，全隊演出只有業餘水準，球隊實力狀態都不濟，面對剋星史特加讓唔起平半，兩軍都係攻優於守，今場雙選入球大同史特加下盤。（有線61及201台周六凌晨3時30分直播）




賀芬咸自邀得巴布執教後本來已有起色，未計上仗對拜仁，之前保持四仗不敗，不過球隊縮皮後實力明顯下滑，前仗主場對殘陣態沉嘅科隆都贏唔到，上仗更畀拜仁數到7個1皮，成隊波冇一個表現合格。


史特加剋死賀芬咸


今仗賀芬咸更要面對剋星，佢哋喺歷史上從未贏過史特加，05年雙方首度於德國盃相遇，賀芬咸主場踢到加時輸波，自08年賀芬咸升上德甲後，7度面對史特加4和3負未贏過，上季主場都輸1:2，擺明格食格，今仗讓唔起波。不過，賀芬咸自巴布領軍後5場聯賽都有波入，今仗又有隊長安達斯碧克同中場領袖沙利荷域停滿復出，箭頭穆拉柏復任正選，攻力料有所提升。




史特加上仗主場遭凱沙羅頓悶和，終止兩連勝走勢，但對手消極踢法由頭到尾志在破壞比賽，史特加無論戰術同組織始終都未到勁旅級數，咬唔入頑固對手情有可原，不過今仗面對連死守本錢都欠奉嘅賀芬咸又唔同講法，憑無私嘅箭頭伊比斯域喺前線不斷為隊友鑽營，夏歷同岡崎慎司勢必爭取機會一吐上仗烏氣。黑柴相信今仗入球唔會少，史特加亦有能力坐和望贏。