拜仁發狂追殺哈化

猪拉多纳

17/03/2012
文： 蘇斯黑柴

德甲剩低最後9輪，拜仁目前落後榜首多蒙特5分，未來場場都係決賽，不過佢哋喺過去一周瘋狂翻身，今晚作客對住尾三嘅哈化柏林可望延續大勝強勢，捧1.75倍「讓球客勝」。（有線61及201台周日凌晨1時30分直播）


拜仁喺十日前仲係頭暈身慶，聯賽畀多蒙特拋離7分，歐聯16強首回合輸畀巴素利，連德高望重嘅教練軒歷基斯都受到質疑，不過德甲班霸始終身經百戰實力超群，喺重要時刻頂住壓力，過去一周先後大炒賀芬咸同巴素利，4日之內轟入14球，箭頭馬里奧高美斯兩仗入7球固然巴閉，但最緊要係洛賓同列貝利返晒嚟，兩人合共貢獻5個入球9次助攻，直接同間接參與咗14個入波當中嘅12球，只要呢雙魔翼處於佳態，拜仁嘅攻擊力堪稱歐洲頂級。


拜仁上次大炒對手7球係聯賽第5輪對弗賴堡，結果贏完之後喺聯賽5連勝，仲連續7場冇失波。如今拜仁氣勢比當時更強，今晚遇弱旅必然繼續數得就數，力圖一鼓作氣迎接未來德國盃4強鬥慕遜加柏、聯賽關鍵戰鬥多蒙特同歐聯半準決賽等挑戰三冠嘅硬仗。

哈化搵利赫高都唔掂

哈化柏林雖然搵咗73歲老帥利赫高救亡，但佢上任後三戰只贏過殘陣嘅不來梅，面對弱旅奧格斯堡同科隆都輸兼冇波入，整體表現無大改善，何況哈化向來畀拜仁恰慣，近11次碰頭輸咗8次，近3次交手都畀拜仁大炒，今仗仲有隊長高拜亞韋利停賽，防線實力進一步削弱，就算主場都難逃大敗厄運。