歐聯決賽組合 皇馬Vs車仔10倍好路

猪拉多纳

19/03/2012

歐聯8路雄師躊躇滿志，向5月20日凌晨喺德國慕尼黑舉行嘅決賽之路進發。近10屆能打入決賽嘅隊伍，以英格蘭球隊次數最多，高達7次，車路士成為今屆歐聯唯一英超血脈，球隊易帥後重生，加上歐聯不利衞冕球隊，車仔要踢走同線巴塞，並非冇可能。最終或出現戲劇性對決，由車路士迎戰昔日主帥莫連奴領軍嘅皇馬，呢個決賽組合賠率有10倍，既好分又有噱頭。


英格蘭球隊屬於近年歐聯決賽常客，近七屆決賽就有六屆有英超兵團出席，包括07/08年度上演全英對決，曼聯鬥車路士，數據上非常旺英超。雖然話今屆只得車路士入八強，而且今季大部分時間表現未如理想，但要留意自從會方炒咗保亞斯，改由迪馬堤奧帶兵後，車仔演出已脫胎換骨，隨時一鼓作氣，再闖決賽。

巴塞遇「衞冕宿命」

車仔要入決賽，最大障礙係四強潛在對手巴塞隆拿，巴塞雖然係「地上最強」，但要面臨「衞冕宿命」危機。自從AC米蘭連奪88/89及89/90年度冠軍後，再冇球隊可以蟬聯歐聯，車路士或可靠宿命因素踢走巴塞。


另一條線，皇馬優勢明顯，八強對手只係尼科西亞，過關冇難度，四強對手拜仁或馬賽，級數同「銀河艦隊」有距離。皇馬教練莫連奴之前帶領過波圖及國際米蘭奪得歐聯冠軍，依家率領人腳更強嘅皇馬，晉級決賽機會更高。

安聯踢決賽拖埋拜仁

不過要留意，今屆決賽話晒喺拜仁主場安聯球場舉行，佢哋應會額外落力，爭取喺自己地頭踢決賽，因此，不妨買個保險，以車路士做膽拖皇馬及拜仁慕尼黑。