1.9倍巴塞×皇馬 又熱又唔穩陣

猪拉多纳

19/03/2012

講到最大路嘅決賽戲碼，點少得皇家馬德里對巴塞隆拿。衞冕嘅巴塞喺8強面對AC米蘭，其實兩隊今屆分組賽碰過頭，當時巴塞1勝1和，心理上稍為佔優。不過假如晉級，到時巴塞多數遇上車路士，雖然車仔有啲跌Watt，不過佢哋踢法硬淨，可能再做巴塞剋星。


皇馬喺8強搞掂完尼科西亞，4強好大機會撞到德甲班霸拜仁，到時未必穩勝。講真，拜仁為咗殺入喺自己主場舉行嘅歐聯決賽，唔會輕易畀皇馬過關，由於決賽組合巴塞對皇馬熱到得1.9倍，似乎唔太博得過。