巴塞魔法斯 「大」騷Quali

猪拉多纳

20/03/2012
文： 力奇

仲差8分！隨住「一哥」皇馬昨晨失分，排第2位嘅巴塞家陣追到落後8分，重燃衞冕希望。今晚「地上最強」返嚟魯營主場迎戰CF格蘭納達，恃住球王「魔法斯」弗到爆兼連贏7場氣勢，要大捷易如反掌。如果嫌讓2球1.44倍「讓球主勝」冇肉食，不妨捧埋中位數3.5球嘅1.57倍入球大啦！（now632台及廣東體育周三凌晨4:00直播）




叫得做「地上最強」，巴塞實力毋庸置疑，最難得係佢哋近況回勇取得7連捷，就連今季一直唔掂嘅作客成績，竟然都突破性咁取得4連勝，依家大勇嘅巴塞，試問又有邊隊頂得住？


3大主力復任正選


雖然全面復操嘅阿費利仲未踢得，「肝病鬥士」艾比度亦預計唔會披甲，不過主帥哥迪奧拿麾下嘅巴塞猛將如雲，一批B隊成員亦係質高之輩，足夠「地上最強」作適度輪換。上仗贏西維爾僅以後備上陣嘅三線主力佩奧爾、施度基達同阿歷斯山齊士，今晚會復任正選，最重要係「球王」美斯腳風順番晒，逢人過人之餘，近7戰仲喪入15球，成個「魔法師」咁款，有佢壓陣，邊使驚冇波入呀？


格蘭納達馬田斯停賽


CF格蘭納達呢邊，目前排第15位已經算有交代。佢哋今季主場表現叫做OK，但作客就不敢恭維喇，事關呢支升班球隊喺西甲13場客戰，竟然有10場係輸波而回！更陰功嘅係佢哋件進攻重心卡路士馬田斯停賽，進一步削弱實力。咪話力奇多心，如果我係格蘭納達主帥，與其喺周中快車作客魯營望搶分，倒不如留力下周一主場鬥西維爾仲好啦！




巴塞要大捷應該冇難度，至於話要入夠4球開出入球大，力奇亦唔多擔心。事關巴塞今季聯賽主場13戰，就有10場總入球數多過4球，慣咗大炒對手。今晚呢場魯營入球騷，你又點可以錯過先？


橫數千軍


 巴塞近7戰勁入24球

‧射手美斯近7戰入15球，平均每仗入逾2球。

‧近7戰全勝入24球僅失5球。

 格蘭納達作客少入波

‧客場13戰僅入8球，全西甲第2差。

‧近14戰有11場開出入球大。