禾堡做東歎漢堡 玩大有着數

猪拉多纳

23/03/2012
文： 蘇斯黑柴

德甲獨腳戲上演北方打吡，禾夫斯堡主場迎戰漢堡，禾堡近期終於搵到最強攻擊組合，計近況遠勝漢堡，不過呢個北方打吡組合向來不利主隊，而周五獨腳戲又不利熱門，今場禾堡主W有暗湧，漢堡志切搶分護級唔會死守，捧1.68倍入球大更穩陣。（有線64及204台周六凌晨3時30分直播）


禾堡近期2連勝兼入6球，喜怒無常嘅教頭馬加夫將較早前畀佢打入冷宮嘅箭頭希美斯解凍，呢位禁區殺手即刻有貨交，近4場入4球，上仗喺反勝紐倫堡更梅開二度，成為球隊反彈功臣，佢嘅復出亦令拍檔文迪蘇傑復甦，近兩場取得1入球3助攻，加上進攻中場迪查加停賽期滿復出，令呢對當弗拍檔有足夠能力喺脆弱嘅漢堡防線搵到甜頭。


禾堡經過苦苦掙扎後終於重返聯賽榜上半區，不過佢哋係今季德甲使錢最多球隊，對目前排第9絕唔收貨，馬加夫需提升成績以求交代。

逃避護級變陣搶分

漢堡較早前換帥，芬克接掌教鞭後曾經有過一段蜜月期，但近期打回原形，近5場聯賽只攞1分，近3仗全敗共失10球，上仗主場仲要1比3輸畀降班膽弗賴堡，目前只比尾三嘅弗賴堡多2分，深受降班威脅。


其實漢堡整體實力唔差得過禾堡好多，而且對賽往績亦有利客軍，雙方近3年6次對壘，作客一方取得4勝2和不敗佳績，漢堡今場變陣出擊，瑞典國腳馬古斯貝治復任正選，同柏歷拍檔雙箭頭，有決心同禾堡對攻，預期入球唔會少！