多蒙特屠「隆」冇手軟

猪拉多纳

25/03/2012
文： Sherry

嗚呀！我個Best Friend 5月結婚喇！但係小妹依家咁嘅身形……點算好呀！好！為咗好朋友，我一定會努力極速收身嘅，哼！只要有恒心，冇嘢難倒我嘅！不過如果大家有咩唔使做運動、又唔多使節食嘅減肥心得，最好就教吓小妹啦……嗚……


小妹「地獄式減肥計劃」強勢啟動嘅同時，德甲嘅多蒙特同樣靜靜地起革命，家陣聯賽剩番8輪，「蜜蜂兵團」只要生生性性，要壓倒拜仁蟬聯封王唔係夢想，今晚佢哋作客狀態唔掂嘅科隆，簡簡單單捧個2倍「讓球客勝」啦！

近4個月未輸過波

多蒙特自從舊年12月頭喺歐聯輸畀馬賽，到依家都仲未輸過波，實力同狀態認真唔講得笑。最令小妹佩服嘅，係呢班波嘅鬥志好到加零一，佢哋喺周中德國盃4強同乙組1哥格雷特霍夫鬥到難分難解，要踢加時，但多蒙特戰至最後1分鐘仍然唔肯放棄，卒之喺補時階段絕殺對手，淨係呢份鬥心，已經值得大家多多少少捧吓場啦！


無可否認，馬里奧葛斯倦勤，唔多唔少影響到多蒙特鋒力，但查實呢位德國新星已經傷咗一排，多蒙特班人一早慣晒，而且小妹勁鍾意嘅日本球星香川真司近排鬼咁弗，上輪聯賽仲靠佢一頭頂死不來梅添，有佢配合德甲射手榜3哥羅拔利雲度夫斯基，使驚冇波入咩？

科隆3大主力齊缺陣

最重要一點，係對家科隆實在太水皮啦！佢哋上仗作客漢諾威，竟被對手大炒1:4，近6戰僅得1勝1和4負，依家仲愁緊降班，實力有幾差唔使多講啦！而且小妹賽前搵過料，科隆件中場大將畢治文鼠蹊受傷，陪住另一停賽嘅核心查查路及養緊傷嘅前鋒烏夫齊齊睇波，單靠「過氣王子」普多斯基，點頂得住成渣「蜜蜂新星」呀？

Sherry靚盤

多蒙特（讓球客勝）

百足咁多爪嘅大學生，熱愛運動，最鍾意同啲Friend唱K兼睇波，曼聯中場路爾斯安達臣同車仔前鋒費托都係佢杯茶！

微博傳情 \(^O^)/

好開心呀！呢排有時間操番鏢，狀態好似好番唔少，哈！上星期我個Friend嘅鏢隊贏咗場比賽，小妹都有去佢哋個慶功Party，成班人一齊分享勝利喜悅嗰種感覺，原來真係好爽o架！呵呵！