飛腳亂龍咬唔入山葉

猪拉多纳

25/03/2012
文： 走肖

上季日職季軍大阪飛腳，竟然淪落到開季連盃賽4連敗，以往有前冇後「超攻擊」，變成依家冇前冇後「No攻擊」。今晚大阪飛腳主場對磐田山葉，隊長明神智和更加要帶傷「強行出場」，加上新教練施拉奧聞到魷魚香，恐怕未係時候反彈，山葉1.85倍「讓球客勝」博得過。（開賽時間：周日晚6:00）


飛腳踢唔起，除咗係放走大批主力造成災難，02年上任嘅教練西野朗離隊無疑係致命傷，新教練施拉奧教過唔少巴西球會，但對亞洲足球嘅認識幾乎接近零。日前飛腳喺亞冠盃作客恥辱性淨吞阿德萊德聯兩蛋，施拉奧循例否認會辭職，但其實佢已經進入炒魷倒數階段。

新帥聞到魷魚香

消息話，飛腳有可能安排助教呂比須坐正做教頭，情況就好似車路士搵迪馬堤奧做看守領隊咁，內部亂晒龍邊似有運行。再講，飛腳似乎得番新簽嘅射手保連奴奧利華拉可以依靠，原有嘅射手拉芬夏同中場遠藤保仁幾乎冇晒影，隊長明神智和有傷落到場都冇用。


另一方面，山葉有門將川口能活喺日前操練受傷肯定長抖6個月，上季攻入12個聯賽入球嘅前鋒金園英學未好番，表面睇的確撐唔落。不過新教練森下仁志講明，希望球隊嚟緊踢得更好，可以令36歲嘅川口能活安心養傷等待復出，鬥心肯定唔輸蝕，撐得過。