撐聖日耳門贏「波」反彈

猪拉多纳

25/03/2012
文： 查里阿蛋

「法甲富豪」巴黎聖日耳門啱啱遭逢安察洛堤接手以嚟首場敗仗，「肥安」為保名節，今晚領軍喺法甲主場撼波爾多點都唔會手軟，而且客軍近排表現不穩，聖日耳門讓半一梗係捧1.86倍上盤啦！（now 631台周一凌晨3:00直播）

波爾多射手高法蘭缺陣

巴黎聖日耳門上場喺法國足總盃8強戰輸畀里昂，令教練「肥安」今場銳意做番齣好戲：「盃賽出局係令人失望，但係咁樣令我哋可以更集中爭奪聯賽冠軍，今場係反彈嘅好機會！」其實聖日耳門喺呢場敗仗嘅下半場表現大有改善，憑住質高兼態勇嘅利尼同柏斯托尼攻堅，今仗要贏波延續聯賽強勢唔係問題。


波爾多教練基爾洛特本身諗住領軍衝擊歐戰席位，但係近4場聯賽只得1勝，搞到佢都灰灰哋：「職業球員對咩對手都要盡全力，不過我哋對住尼斯同埋阿些斯奧都失分，好難挽回劣勢。」最慘嘅係主力射手高法蘭腳傷缺陣，波爾多想踩行油博一鋪都難，今場都係難逃一敗喇！