馬賽得細不饒仁

猪拉多纳

28/03/2012
文： 笛子波童

歐聯八強首回合法德大戰，法甲馬賽主場迎戰德甲拜仁慕尼黑。馬賽今場有正選門將文丹達及中堅蘇利文尼迪亞華拉缺陣，相信會沿用上圈兩鬥國際米蘭嘅保守悶蛋踢法，加上拜仁近期作客表現唔標青，對上五場有四場交白卷，波童捧1.75倍細盤。（有線62及202台周四凌晨2時45分直播）


同上圈兩鬥國米一樣，馬賽今次都係先主場後作客。馬賽上次雖然能在主場先下一城，不過全場真正具威脅埋門唔多，最終憑阿休完場前一刻偷襲得手，為晉級打下良好基礎。其實馬賽一向係歐聯主場細盤王，連同上屆歐聯，近八場歐聯主場開出七細一大，當中七場細盤唔係1:0就0:0，簡直好路到暈。

拜仁歐聯作客全細

拜仁上圈次回合大炒巴素利七比○，創下歐聯淘汰賽最懸殊比數，加上於本土賽事接連大勝賀芬咸及哈化柏林，進攻火力的確得人驚，不過除大勝弱旅哈化柏林之外，拜仁對上五場作客有四場都贏唔到，而且全部交白卷，整體發揮同主場差好遠。


拜仁今季主場成績有保證，只要今場和波或者唔好大敗，次回合有一定把握可以翻盤，上圈首回合作客巴素利輸○比一就係好例子，配合埋佢哋今屆歐聯作客五戰全部開出細盤，今仗出現大手交易機會甚微。