珀斯光輝齊「心」闖關

猪拉多纳

01/04/2012
文： 自由恒

由於澳職開賽時間夾晒香港，因此深受本地菠菜人士歡迎，但其實單講比賽質素，筆者真係不敢恭維，但就幾欣賞佢哋嘅季後賽制度，首先常規賽冠軍毋須等到其他對手廝殺完之後先至出場，可以先同「阿二」踢番兩回合嘅決賽資格賽，保持番一定作戰狀態，其次係就算喺資格賽輸波，都仲可以同3至5名嘅對手再爭決賽席位，唔係一場定生死。


雖然賽制無疑對頭兩名稍為有利，但「一哥」中岸水手同「阿二」布里斯班獅吼嘅奪標賠率實在熱得太驚人，兩隊分別為3.1同1.38，反觀今午出場嘅「三哥」珀斯光輝，竟然冷到15倍，查實佢哋喺常規賽都贏過中岸水手，雖然要闖3關先去到決賽，但未至於全無機會，不妨率先捧場。

墨爾本雄心50倍奪標冷門

當然珀斯光輝要贏得總冠軍，就必先要喺今日一場過嘅淘汰賽，喺主場擊退常規賽排第6嘅墨爾本雄心。雄心要去到最後一刻先取得季後賽入場券，但近仗對住上晒岸又抑或一早收晒皮嘅球隊都冇料到，就知佢哋實力唔夠，難怪冠軍賠率有成50倍。相反主隊嘅珀斯光輝雖然一早取得季後賽資格，但近仗並唔見放軟手腳，近6次主場5勝之餘，王牌射手史美斯更於剛戰食出大四喜，1.8倍主W相當抵博。（有線64及204周日下午5：00直播）

足球重心：珀斯光輝（勝）

馬膽推介：8場(4)共創未來


未交代嘅摩廐馬戰意唔成疑問，奈何總係遇上強敵，適逢全港短途精英都去晒杜拜，今仗唔使負重磅之餘，對手亦只係狀態回落嘅「小橋流水」同埋無復當年勇嘅「蓮華生輝」，要把握季內最黃金機會。

澳職季後賽賽制：

今輪為季後賽第一圈，以一場過分勝負，若法定時間內打成平手，需加時作賽，再和則互射12碼分勝負。