「加納美斯」孭飛 武里南聯受讓劏車

猪拉多纳

04/04/2012
文： 蘇豪

武里南聯於亞冠盃Ｈ組殺出一條血路，呢支泰國代表有「加納美斯」阿奇姆彭在陣，今屆分組賽兩戰全勝表現突出，今輪主場對南韓褪色勁旅全北汽車有得受讓，要「讓球主勝」！


（周三晚７時30分開賽）


泰國大軍武里南聯2010年獲當地富豪兼政客尼溫收購，即時四出招兵買馬，先後簽下多位非洲兵，其中加納前鋒阿奇姆彭最受矚目，呢個十八歲小將有「加納美斯」之稱，曾經同巴勒莫及曼城等歐洲球會扯上關係，喺泰國搵食絕對超晒班，今屆佢於亞冠盃一再展現驚人速度同一流射術，非常犀利。另外，喀麥隆射手奧漢特薩踢過費德列斯達，屬另一危險人物，呢對非洲前鋒惡到暈！

全北汽車中門「大」開

全北汽車主帥崔康熙上年畀南韓國家隊撬走，球隊依家陸續出現問題，當中以後防問題最嚴重，大軍於亞冠盃分組賽兩戰全敗，兩場同樣輸一比五，潰不成軍，士氣嚴重受挫。全北返到聯賽同樣唔掂，上仗對ＦＣ大邱反勝為敗，愈踢愈沉，今次遠征泰國處於劣勢，仲要讓波，梗係捧對家啦！另外，武里南聯進攻火力勁，全北汽車經常不設防，呢場可兼顧入球大。