紐記喪攻做「大」事

猪拉多纳

06/04/2012
文： 走肖

復活節假想睇波？史雲斯今晚喺英超主場對紐卡素，啱晒你同我。重燃歐聯參賽希望嘅紐記有入球者聯盟「DC聯」丹巴巴亞同柏比斯施斯孭飛，對住唔知醜成日玩對攻嘅史雲斯，當然要捧2倍入球大！（有線200、300及廣東體育周五晚11：30直播）


最近紐記射手丹巴巴亞被英國《太陽報》選為英超史上最佳自由身球員No.2，雖然近排佢腳風回落，但依然有16個聯賽入球喺手，谷埋咁耐隨時大爆發。淨睇領隊柏杜最近要求球迷幫手，說服丹巴巴亞唔好喺嚟緊暑假離隊，就知佢大把貨賣，對住史雲斯入波發威唔出奇。

柏比斯施斯近3戰省5粒

就算你信唔過丹丹巴亞，都唔可以睇小同樣來自塞內加爾嘅柏比斯施斯，佢喺1月加盟紐記後，即刻上身式瘋狂入波，加埋日前梅開二度打沉利物浦，轉會後佢上陣7場勁入7球，包括近3場入5球發晒癲。呢個「DC聯」組合根本擋唔住，依家紐記爭緊歐聯入場資格，入波當然唔可以畀佢停。

史雲斯齋攻唔守防線曳

升班嘅史雲斯喺領隊羅渣士帶領下，夠膽死玩進攻足球，原本畀人睇死，但依家至少唔需要為降班擔心，代表作有主場以3：2打爆阿仙奴。不過咁，史雲斯今季對曼城、車路士同布力般流浪都試過單場失4球，防線好兒戲，即使上場唔能夠倒戈出戰，借用嘅熱刺嘅中堅哥爾卡今場可以踢番，依然係買入球大着數。

橫數千軍

 史雲斯對賽輸蝕


‧近6次對賽得2和4負。

‧連盃賽近10場得2場冇波入。

 紐卡素作客唔曳

‧連續3場半場不失兼領先。

‧近9場作客得3勝6負。