希比亞請利華食開心漢堡餐

猪拉多纳

08/04/2012
文： 蘇斯黑柴

德甲漢堡主場鬥利華古遜，利華連同歐聯對巴塞已經5連敗，但今仗有新帥效應，實力亦遠勝漢堡，加上主隊今仗陣容天殘地缺，平手盤黑柴強捧利華古遜。
（有線61及201台周日晚11時30分直播）

利華啱啱炒咗不受球員歡迎嘅少帥杜特，改由希比亞同原Ｕ19教練沙查．羅拔利雲度夫斯基領軍，希比亞名義上係經理，原因係未有認可教練牌，但實際上佢至係新帥，呢位前芬蘭國腳無論喺効力利物浦同利華古遜時期，球技同品格都受到一致推崇，佢同利華古遜陣中多名球員都情同手足，上任後立即為訓練營帶嚟歡笑聲，佢嘅「兄弟」波歷克亦由長期養傷中突然康復，預期球隊今晚會有大幅進步演出。


漢堡陣容天殘地缺


漢堡上仗只能險勝毫無攻力嘅包尾大幡凱沙，但之前6場聯賽加埋只得1分，已積弱多時，今仗仲受到嚴重傷停問題困擾，守將戴克美亞同中場積高普沙拉上仗雙雙受重創，另一中場哥高加卡累積5黃牌要停賽，球隊本身已經有箭頭荷西古里路同中場湯馬士連干因為停賽同受傷缺陣，陣容已經極殘，但禍不單行嘅係下半季多次拯救球隊嘅門將杜布尼喺上周二訓練中受傷，過去一個星期都冇練波，今日上陣機會唔樂觀，副選門將麥基爾亦養傷多時，今仗隨時要用年屆34，又毫無德甲經驗嘅尼奧侯斯頂檔，難擋有番晒士氣嘅利華強攻