愛華頓主場捉「黑貓」

猪拉多纳

09/04/2012
文： 自由恒

由於嚟緊周中冇歐洲賽上演，好幾年未辦過嘅英超復活節周一快車，喺今年又同大家見面。去到季尾階段，唔少球隊拚搏得七七八八，上咗岸嘅中型班都喺剛過去嘅周末聯賽作出輪換，以應付頻密賽期，其中一隊就係愛華頓。

近3場聯賽2勝1和

愛華頓上場作客諾域治，中場費蘭尼同埋後衞希汀加都只係打後備，變陣除咗因為賽期頻密之外，當然係為嚟緊周末對紅軍嘅足總盃4強戰作好準備。「拖肥糖」今晚喺英超主場迎戰新特蘭，毫無疑問會夾雜副選，但睇番佢哋近3場聯賽取得2勝1和，估計呢隊波唔會學同市宿敵利物浦，選擇徹底放棄英超。還記得愛華頓09年踢足總盃前夕，最尾4場聯賽都攞到3勝1和，有理由相信佢哋會保持積極態度，應付今季餘下聯賽。


對手「黑貓」新特蘭喺之前嘅足總盃8強戰畀愛華頓淘汰之後，今季基本宣布提早收爐，雖然近期都幾鍾意做攔路虎，連續令熱刺同曼城失分，不過對住布力般同西布朗就全失3分，睇番佢哋過往4季聯賽作客葛迪遜公園都輸晒，今次應該都唔會例外。（有線201及301周一晚10：00直播）