蜂仁夜搞慶全世界

猪拉多纳

11/04/2012
文： 蘇斯黑柴

德甲快車夜，爆發全季最矚目王者戰，榜首「蜜蜂兵團」多蒙特主場迎戰班霸拜仁慕尼黑，一戰成敗直接關鍵爭霸結果，雖然同晚仲有英超意甲上演，但曼市雙雄爭標已無懸念，意甲亦冇大戰，呢場德甲最強戲碼勢必成全球焦點，就算平時唔係德迷都要癲埋一份呀！


（有線61台周四凌晨2時直播）


德甲剩餘五輪賽事，多蒙特暫時以三分之差領先次席拜仁，只要今仗贏波，衞冕機會將高達八成，相反若告敗陣，因為得失球差輸蝕，就要將榜首席位讓予對手，到時強勢嘅拜仁就好有機會一鼓作氣直帶到終點。若然和波，多蒙特保持優勢，就要睇餘下四輪最終衝刺。

多蒙特贏得拜仁尊重

喺以往，班霸拜仁一直係德甲旗幟，永遠係爭霸主角，多蒙特只配做挑戰者角色，不過到今日情況有所轉變，除咗喺上季以黑馬姿態封王外，多蒙特今季延續強勢，而且過去三次交手都擊敗拜仁，已經徹底贏得拜仁嘅尊重，拜仁巨頭路明尼加同拿寧加，賽前都話多蒙特已經成為拜仁宿敵，兩軍關係就好似西甲嘅巴塞隆拿同皇家馬德里一樣添！

鬥弗鬥唔輸得敲和局

多蒙特已經保持聯賽23輪不敗，喺往績佔優加上主場之利下，今仗有充足信心抗擊強敵；不過拜仁球員質素同經驗始終佔有一定優勢，近期5連勝已全面回勇，亦有足夠決心一雪近仗交手敗辱。


既然兩軍實力相當，臨場任何一方一個錯誤都足以影響勝負，從菠菜角度睇今場唔係理想投X場合，既然雙方都唔輸得，今仗料會謹慎從事，一旦有一方落後就勢必傾全力反撲，黑柴認為平手盤投X任何一方都欠缺把握，不如小注怡情，敲3.4倍和局等睇好波！

剩低四輪多蒙特較惡踢

德甲雙雄除咗今晚正面對撼，雙方各餘下四輪賽事，其中多蒙特下仗要作客當弗嘅宿敵史浩克04最難應付；拜仁對手較弱，但要分心應付歐聯準決賽對皇馬嘅兩回合惡戰，彼此形勢扯平，所以今晚一戰絕對關鍵。

雙雄餘下賽程

多蒙特

14/04/2012作客對史浩克04

22/04/2012主場對慕遜加柏

28/04/2012作客對凱沙羅頓

05/05/2012主場對弗賴堡

拜仁慕尼黑

15/04/2012主場對緬恩斯

21/04/2012作客對雲達不來梅

28/04/2012主場對史特加

05/05/2012作客對科隆