銀河艦隊撞冧馬體會

猪拉多纳

11/04/2012
文： 朱楓

連卡斯拿斯都賭皇馬贏，你唔係唔跟呀？今晚西甲爆發「馬德里打吡」，由馬德里體育會主場大戰皇家馬德里。皇馬為爭標本身戰意已秤先，何況「銀河艦隊」已恰咗馬體會13年，適逢對手今晚仲有3件主力停賽，難怪皇馬門將卡斯拿斯都話如果自己有得賭會瞓身撐皇馬，家陣有1.55倍真係好抵玩！（now632台周四凌晨4：00直播）

效率王迪馬利亞孭飛

早排領先巴塞多達10分嘅皇馬，日前主場賽和華倫西亞0：0後，領先優勢縮減至4分，今晚作客馬體會，為爭標可以話非勝不可。雖然教頭莫連奴繼續玩失蹤唔去記招，據西班牙《阿斯報》爆料，皇馬為達成呢個任務，今晚會變陣出擊，改派傷愈無耐嘅「天使」迪馬利亞擔正。雖然佢今季出勤率僅32%，但上陣24場卻交出7球同14次助攻，效率驚人，再睇埋莫連奴自從轉戰西甲後，5次率隊踢「馬德里打吡」獲得全勝，對皇馬嚟講可以話係「雙重保險」。


睇番往績，其實皇馬自99年後，再未輸過畀馬體會，當中門將卡斯拿斯喺職業生涯入面，11次作客馬體會更未輸過得9勝2和，難怪「聖卡斯」賽前接受Bwin菠菜公司訪問時都話：「如果有得買，呢場我一定瞓身買皇馬贏。」

馬體會3主力停賽

對家馬體會自從由施蒙尼執教後，表現大有好轉，賽前中場迪亞高大讚皇馬今季表現優異，但絕對唔係無敵，有信心帶隊終止對皇馬13年不勝魔咒。不過睇番數據，原來教練施蒙尼喺球員時代代表馬體會踢5次「馬德里打吡」錄得全敗，連佢自己都搞唔掂，試問又點畀到球員信心破呢個不勝宿命？何況馬體會今仗仲有前鋒伊度亞度沙維奧、中場馬里奧蘇亞雷斯同中堅祖奧米蘭達停賽，射手法卡奧亦啱啱病愈，隨時冇料到，今晚對住夫添嘅皇馬，恐怕又一次要俯首稱臣！

橫數千軍

馬體會對皇馬7連敗


‧自1999年嚟未贏過皇馬。

‧近7次對「銀河艦隊」輸晒。

皇馬西甲入百球No.1

‧近5次作客交手全開「客客」。

‧31戰喪入100球火力冠西甲。