多蒙特求冧莊唔放過拜仁

猪拉多纳

11/04/2012
文： 走肖

2016年有咩大事？唔係講N年前部大片《2046》，而係多蒙特嘅「2016計劃」！最近佢哋成功游說骨幹續約到2016年，今晚喺德甲榜首戰主場迎戰拜仁慕尼黑，仲有馬里奧葛斯傷愈復出，平手盤抵博！（有線61周四凌晨2：00直播）

香川唔想續約 兩周後定去向

多蒙特上年暑假冇咩買人，今季原本被睇淡，之不過佢哋喺歐聯晨早出局可以集中火力喺聯賽搏殺，踢到依家仲以3分騎住拜仁。最難得係，巴里奧斯季初受傷，造就利雲度夫斯基成功跑出，暫時攻入19個聯賽入球，咁好景，難怪多蒙特要提早同教練高普、新星馬里奧葛斯同中堅曉姆斯續約到2016年，當中預計今場復出嘅馬里奧葛斯，年薪上升到全隊最高360萬歐元（約3,650萬港元）。


講到「2016計劃」，當然唔可以漏咗日本國腳香川真司，今季佢連盃賽上陣36場攻入15球、助攻10次，《圖片報》話曼聯同車路士都對佢有興趣，打算出價1,500萬歐元斟介，所以多蒙特早三個星期前就提出將佢嘅150萬歐元年薪，倍增到300萬歐元（約3,050萬港元）氹佢續約，不過佢覺得自己有條件踢大會，想諗多兩個星期再決定係咪走人，現階段只係想表現自己，同集中精神幫多蒙特衞冕。相反拜仁事先講明會踢走教練軒歷基斯，士氣輸九條街，近3次對賽又輸晒，就算平手都唔值得亂博。

橫數千軍

多蒙特近3戰喪入波


‧近3場比賽共入13球。


‧今季聯賽主場14戰共取得11勝2和1負。

拜仁對賽3連敗

‧近10戰取得9勝1和。

‧近3次於聯賽硬撼多蒙特都全失3分。