伊比斯域弗爆撐史特加

猪拉多纳

13/04/2012
文： 朱楓

要數德甲近期至Hit球隊，唔使講一定係史特加！自從伊比斯域加盟後，成隊波進攻着晒火，家陣仲有機爭下屆歐聯席位，試問點會唔搏？難得今晚主場對住日前有成個鐘打少一個嘅雲達不來梅，未開波體力已經贏晒，2.88倍「讓主」捧得過！（有線64及204周六凌晨2：30直播）


德甲仲有4輪就煞科，家陣除咗爭標同護級，其實爭下屆歐洲賽入場券形勢亦好激烈。當中目前以46分排第5嘅史特加，假如今晚贏波，會追到落後第4嘅慕遜加柏4分，須知慕遜近排勁頹，史特加要後上做「四哥」真係唔係冇機會o架！


不過講到底，朱楓今場對史特加咁有信心，全因佢哋件箭頭伊比斯域自季中加盟後發晒癲，單係下半季就喪入8球，加埋嗰件日本新兵酒井高德頻頻喺右路發難，結果成功激活球隊嘅火力，近3仗每場至少入3球，都咪話唔犀利。陣容方面，後衞保拿奴斯繼續唔出得，但其餘傷兵，好似日本翼鋒岡崎慎司、中場伊巴謙查奧爾同根拿日前對奧格斯堡都傷愈重返後備席，兵源極之充裕。

疲兵不來梅5戰不勝

不來梅暫時以42分排第8，但落後慕遜已達11分，爭入下屆歐聯可以話好渺茫，何況佢哋近況超曳，日前主場打和慕遜加柏後已錄得5場不勝，最攞命係喺呢場比賽入面，後衞保尼斯治喺上半場27分鐘就被逐，搞到不來梅剩低成個鐘要以10人應戰，都咪話唔嘥體力，依家休息唔夠3日又要作客平治球場真係幾令人擔心，畢竟不來梅本身傷兵都幾多，日前對慕遜已經要搵中堅拿杜客串防守中場，你話今晚作客弗到爆嘅史特加仲邊似有運行？

猪拉多纳