直取羅馬讓球勝

猪拉多纳

15/04/2012
文： 巨高

現時嘅羅馬係一支極有朝氣嘅意甲球隊，自從美資注入之後，羅馬營運策略有咗好大改變，似乎美國老闆有意大展拳腳。而球隊今季目標係爭取來屆歐聯參賽資格，藉以進一步增強球隊嘅吸金能力。本周羅馬主場對費倫天拿，作客嘅費倫天拿實力大不如前，加上作客演出又差，羅馬讓波冇問題，建議直取「讓球主勝」。


（now 633及660周一凌晨2時45分直播）

托迪為破紀錄 搶士哥

羅馬踢主場波特別醒神，歇冬之後只曾不敵同市球隊拉素。而早前喺意大利盃，羅馬亦曾以3比0打敗今場對手費倫天拿，照計轉戰聯賽對於羅馬爭勝有好冇壞。話晒都要爭歐聯資格，今場又點肯放過「紫百合」先？


另一方面，隊長托迪本身亦有目標要爭，因為現役意甲球員只得佢取得超過200個聯賽入球，佢只差4粒就可以追平經典射手艾達芬尼及梅亞查216球嘅紀錄。留意到近期世界各地嘅老將都火噴噴，比如魯爾、迪比亞路、亨利及雲佬都頻頻交出好表現，都係時候輪到托迪發火啦！

主將有離心 護級勢危

費倫天拿方面依家要搶分護級，不過球隊走勢奇差，護級形勢認真唔樂觀。再講，陣中好多球員都唔想留喺佛羅倫斯，如果累到球隊「成功」降班嘅話，會方就要根據合約條款焗賣球員，比如祖安華加斯、蒙杜利禾及祖維迪，隨時會喺暑期他投。而早於冬季轉會市場，前鋒基拿甸奴已經提早跳船，睇嚟費倫天拿前景都幾黯淡，今場作客羅馬，畀主人家大炒一啲都唔出奇，「讓球主勝」係正路之選。