韋根爆廠玩鋪大

猪拉多纳

16/04/2012
文： 蘇豪

英超周二凌晨獨腳戲阿仙奴主場對韋根，韋根去到護級生死關頭發揮小宇宙，上場砌低埋曼聯，球員狀態箭嘴向上，今次惡鬥「兵工廠」唔會做縮頭烏龜，大軍今季客場聯賽大盤率逾七成，蘇豪話今場一於玩鋪大！（有線300及200台周二凌晨3時直播）


韋根雖屬下游分子，但於西班牙籍教頭馬天尼斯帶領下技術水平唔低，真係搓得兩板。經過大半季經營，近期終於修成正果，早前作客打敗「紅軍」利物浦未算叻，上場技術性擊倒曼聯先犀飛利，前線域陀摩西斯放到「紅魔鬼」班守衞索晒氣，另一進攻主力馬隆尼射入靚波盡顯級數，加埋正箭頭迪山度唔錫力周圍走扯散對手防線，呢個進攻三叉戟唔錯o架。


韋根離開主場作賽，搶分難度進一步提升，不過正如馬天尼斯所講，依家佢哋信心好強，若踢出最佳水準，絕對有力向任何對手帶來麻煩。雖然布力般流浪及昆士柏流浪等護級大敵先後輸波，但韋根只係領先尾三保頓兩分，仍然好危，客場出擊都唔會坐以待斃。睇番數據，大軍今季聯賽作客十六戰十二場開大，大盤率達七成五，反映球隊唔會縮埋死守。

阿仙奴防線欠穩

阿仙奴進攻主力尹佩斯、禾確特同路斯基好弗，連班拿約都鹹魚翻生，冇乜地方好挑剔。不過，球隊防線中路仍存隱憂，梅迪薩卡養傷，哥斯尼停賽，隨時要用甩位王佐羅拍華美倫，點頂弗爆嘅域陀摩西斯呀？「兵工廠」近十次主場出擊贏九場，今仗贏面仍高，但1.18倍熱Ｗ唔抵玩，雙方近六次聯賽交手大晒，熱捧大盤，可博總入球「4」、「5」。