維加泰鋒繼續吹

猪拉多纳

18/04/2012
文： 蘇豪

311大地震發生超過一年，災區球隊仙台維加泰愈戰愈勇，證明真材實料，並非單靠災民力量支持而彈起，維加泰以死球戰術同快速反擊克敵，兩招同樣使得，今日黃昏出戰聯賽盃A組賽事，作客川崎前鋒可故技重施，有望延續強勢，受讓要「讓球客勝」！（周三晚6時開賽）


仙台維加泰本屬日職中下游球隊，上年遭遇311大地震打擊，反而變得更強，最終以第四名衝過終點。維加泰新季更上一層樓，開季聯賽六戰五勝一和排榜首，上場作客殺敗去季冠軍柏雷素爾，處理死球同反擊都好出色，即使中場重心梁勇基缺陣，亦擁極強戰鬥力。川崎前鋒近六戰不勝，上場贏住兩球都反輸畀大阪飛腳，後防好曳，讓唔起維加泰！

紅鑽「細」勁

同組賽事浦和紅鑽主場對大阪櫻花，紅鑽改由名帥柏高域領軍後戰績理想，現時於聯賽位列次席，主場四戰不敗，贏過柏雷素爾同仙台維加泰，勢頭甚勁。紅鑽新兵阿部勇樹同槙野智章有級數，條件不俗，但今場贏波賠率高得離奇，唔似贏得。櫻花今季作客四戰三場保持不失，守得穩，紅鑽主場入波同失波偏少，捧入球細最好！

日聯盃推介

磐田山葉　大


仙台維加泰　讓球勝


浦和紅鑽　細