皇馬狂攻射爆拜仁

猪拉多纳

25/04/2012
文： 阿占

「銀河艦隊」今晚大反擊！喺歐聯4強首回合輸1：2嘅皇家馬德里，今晚返到主場迎戰拜仁慕尼黑非勝不可。小弟認為皇馬愈係處於劣勢，贏波嘅機會就愈大，加上佢哋擁有一班強大進攻精英，火力十足，只要放膽去攻就幾乎實冇甩拖，拜仁想抵擋皇馬瘋狂攻勢唔容易，1.45倍主勝值得捧場。（有線61、64、201及204、中央5台周四凌晨2：45直播）


皇馬首回合臨尾香輸畀拜仁，好大程度因為佢哋追和後踢法保守，諗住保住個和局完場。其實教練莫連奴最終計錯數亦唔係意外戰果，事關小弟留意到，好多時如果皇馬打守勢波，咁王牌C朗反而發揮唔到應有水準，呢點亦係C朗成日畀人鬧「大賽隱形」嘅原因之一。不過今場皇馬焗住唔可以再守，一定要嚟個大反擊自救！

西甲主場平均每戰入4球

有C朗、希古恩、賓施馬、迪馬利亞、卡卡同奧斯爾等一大班天才球員喺手，莫連奴手上奠勝巨星多到出唔晒，預計今晚實大踢進攻足球，C朗喺主場又可以大演佢拿手嘅射門技術。皇馬今季西甲主場平均每場入差唔多4球，要收復首回合失地絕對唔係難事。況且莫連奴更催谷士氣話︰「我認為我會繼續教皇馬，根本冇理由離開。」

門口狗拜仁作客唔多掂

拜仁失意德甲爭標後，歐聯就係佢哋最大目標，中場舒韋恩史迪加亦咬牙切齒話要報仇，為自己首回合踢得差進行大平反。可惜呢隊波作客表現同主場爭好遠，16強作客就輸過畀巴素利，早排聯賽冠軍關鍵戰作客多蒙特亦輸埋，證明佢哋打作客硬仗認真信唔過，睇怕呢場大戰好大機會要目送皇馬入決賽，殺入自己嘅安聯球場！

橫數千軍

皇馬歐聯主場強勁


‧近11場歐聯主場獲10勝。

‧史上主場對德球會獲17勝3和2負。

拜仁作客皇馬往績曳

‧史上作客皇馬得2勝1和6負。

‧史上作客西班牙球會獲5勝4和9負。

賽制：

歐聯4強採主客兩回合制，今輪為次回合，若兩回合總比數賽和，以作客入球較多一方為勝，若作客入球相同，則在次回合後加時30分鐘，若雙方在加時取得相同數量入球，由作客球隊獲勝，若加時沒有入球，則互射12碼分勝負。

頂占筍盤：皇家馬德里（主勝）

有線球彩台主持阿占

電郵：soccer64@cabletv.com.hk

PHONE波熱線：1831 678

「球彩俱樂部」開放時間：周三晚10：00至11：45