祖記爭冠唔放生切塞納

猪拉多纳

25/04/2012
文： 走肖

切塞納今晚喺意甲主場對祖雲達斯，隨時變炮灰，經歷「電話門」後元氣大傷嘅祖記，今季難得復興有機會奪冠，高層已經開出重賞鼓勵少帥干地完成任務，臨近衝線當然要畀油繼續贏，1.6倍「讓球客勝」追得過。（now632台周四凌晨0：00直播）


假如祖記重奪意甲錦標，教練干地可以獨得50萬歐元（約511萬港元）獎金，而且現時佢嘅150萬歐元年薪，將會增加至雙倍嘅除稅後300萬歐元（約3,067萬港元），令佢登上意甲最高薪教頭寶座，新合約至2015年屆滿。正因為咁，最近祖記喺佢統領下聯賽6連勝，當中有5場至少淨勝兩球，睇得出干地對巨獎志在必得。

切塞納15戰不勝等降班

祖記贏到開巷，球員要保飯碗都係主因，事關意大利傳媒大爆，今年暑假祖記會喪燒8,000萬歐元擴軍，迎接下屆歐聯，冇表現隨時被趕扯！再講，最近祖記搵到車廠Jeep做佢哋未來3年新波衫廣告贊助商，勁袋3,500萬歐元，為咗向新贊助商交代，剩低幾場聯賽當然唔衰得。


雖然「斑馬軍團」有前鋒加利亞雷拉停賽肯定缺陣，但佢哋前線大把人用，根本唔憂冇波入，面對近15場聯賽得7和8負，長期包尾幾乎篤定降班嘅切塞納，依然夠殺有餘。