華倫焗攻同馬體會駁火

猪拉多纳

26/04/2012
文： 麥馬拿仁

四大殺手爭入歐霸決賽！香港周五凌晨嘅歐霸四強次回合，4支角逐球隊華倫西亞、馬德里體育會、畢爾包同士砵亭，各自擁有一位「殺手級」前鋒，生死關頭佢哋定必使出渾身解數，實行「大」廝殺鬥士哥，如此場合，捧入球大正路！


提起法卡奧、阿祖安盧比斯、蘇爾達杜、莊拿斯干卡維斯，必定諗到「入球」！歐霸盃四強次回合，華倫西亞主場鬥馬體會，華倫輸緊二比四焗攻；馬體會殺手法卡奧兩屆歐霸共入廿七球，踢一個都夠，今仗捧大！（有線61及201台周五凌晨3時05分直播）


首回合雙方鬥得燦爛，馬體會一開波搶得就搶，鬥心絕對一百分，好彩華倫完場前追到二比四，今場淨勝二比○就晉級，所以次回合仍會搏命。兩軍都好恨攞歐霸盃，其中馬體會擁有「歐霸盃之神」法卡奧，呢位哥倫比亞神箭，一打歐霸就上身，去屆入十七球成神射手帶領波圖捧盃，如今轉打馬體會依然sharp醒，依家入到十球，加埋師弟阿祖安盧比斯，今仗揸住兩粒優勢，可以放心打反擊，佢哋再有入波唔奇。

盃賽主場最醒神

華倫踏入2012年明顯跌watt，首回合怯於馬體會威勢，球員如夢遊球場。好彩上仗西甲主場大炒貝迪斯四比○，蘇爾達杜終執番對射門鞋，對「蝙蝠兵團」好大幫助。事實上，華倫今季踢主場盃賽好醒，近兩圈大數阿爾克馬爾及燕豪芬，兩仗都轟入四粒；之前歐聯更炒亨克七蛋，今仗背城借一必狂攻對手。